Estimado/a socio/a:
Poñémonos en contacto contigo para informarche dos seguintes puntos, tratados na Asemblea celebrada o Luns 13/08/12:
1.- Cotas Socios Tempada 12-13.- O importe das cotas desta tempada seguen como as da tempada anterior (40 €). Dado o pouco tempo de que dispoñemos, e a necesidade de facer pagos de fichas e outras taxas, vémonos na necesidade de, nos próximos días, pasar as cotas da tempada 12-13 aos socios/as que teñan domiciliado o seu recibo. Agradeceriamos que os demais socios, que o teñan a ben, fixesen o pago en calquera das seguintes entidades e contas do Club:
– Banco Pastor : Nº Conta 0072 0429 01 0000102239
– A Caixa : Nº Conta 2100 6025 46 0200006310
– Novagalicia Banco: Nº Conta 2080 5106 71 3000004360
No recibo deberá poñer:
Concepto: Cota socio tempada 12-13
Ordenada por: nome e apelidos do socio/a
Cota: 40 €
Cota pais Fútbol-Base: 80 € (2º fillo 40 €).
Posteriormente, os carnés serían retirados no Local do Club, presentando o xustificante de pago.
2.- Composición Xunta Directiva.- A nova Directiva queda conformada do seguinte xeito:
- Presidente: Germán A. Rúa Díaz.
- Vicepresidente 1º: Ramón Vilasó Miranda.
- Vicepresidente 2º: Álvaro Núñez López,
- Vicepresidente 3º: Vicente Silva Conles.
- Director Xeral: Pedro Porto Silva.
- Secretario: Ernesto González Caramés.
- Tesoureiro: Jerónimo Búa Lado.
- Vocais: José M. Millán Paz, Ventura Pérez Castro, Emilio Díaz Rodríguez, Constantino Hermida Ferrín, Manuel Fuentes Martínez, Enrique Varela Calvo, Gonzalo Brea Caramés e Nazario Freire Núñez.
- Director Deportivo: RAFA SAEZ
3.- Situación actual e proxectos.- Quedan resumidos nos seguintes puntos:
a) Campos de Xogo.- En canto aos campos de xogo, hai dificultades porque o de herba sintética está en execución e o de Mirallos estano arranxando. Posiblemente se teña que recurrir aos campos dos Concellos dos arredores (Campo Lameiro, Valga, …). Xa se verá como solucionar este problema.
b) Financiamento.- Como só se dispón de 941,62 €, apremia pasar a cota de socio, por iso, se informa de que , aos que o teñan domiciliado, se lle pasará nos próximos días. O financiamento do Club basearase nas cotas dos Socios, subvencións empresas, explotación cantina do campo de fútbol, subvencións institucións, Concello, Deputación, Xunta de Galicia, lotería do Nadal e en sorteos que se farán ao longo da tempada. En canto aos sorteos, anticípase que o primeiro sorteo será o dun MAZDA 3 que Ramón Vilasó Miranda, xerente da empresa AUGASA-MAZDA de Vigo e Vice-Presidente do Moraña C.F., nos enviará cun prezo Franco Fábrica. Aínda está sen decidir o prezo das rifas.
c) Outros Obxectivos.- En breve prazo disporemos dun local para Club, e que será o que a ACD Moraña tiña na Rúa Nº 11; para que serva como punto de reunión dos compoñentes do Club (Xogadores e técnicos, Directiva, Socios, etc…). Outra das ideas sería a de retomar a organización do Torneo Internacional do Fútbol Cadetes, que fora un éxito e que tanto prestixio lle dera ao Concello de Moraña; xa que, xogadores que participaron nel, agora son figuras consagradas do fútbol europeo.
4.- Proxecto Deportivo.- Presentouse a Rafa Sáez como Director Deportivo, que coordinará a todas as categorías do Club, e que compaxinará co cargo que ten coa Federación Galega de Fútbol, como Director da escola de adestradores de fútbol. Recordouse o seu historial deportivo: xogador en equipos como Arousa, Pontevedra, Celta-B , R.C.Celta de Vigo (chegando a dirixilo en 1ª división), Logroñés, etc. Tomando a palabra Rafa, explicou aos presentes o seu proxecto, que estará baseado en tres piares moi importantes:
- INSTALACIÓNS.- Moi importantes para levar a cabo as ideas que conforman o proxecto. Nese intre intervén a alcaldesa, Mª Luisa, indicando que, namentres as instalacións de Moraña non estean acondicionadas (calcula que para fin de ano estarán listas), poderanse utilizar as de Campo Lameiro, cun custo de 0 €.
- ENTRENADORES.- Outro dos piares básicos, sobre todo, nas categorías inferiores, son as persoas encargadas da formación dos nenos. Tratarase de atinar na súa elección.
- ADMINISTRACIÓN DO CLUB.- A administración do Club deberá dar un xiro de 180º. Todo vai pasar polo que se coñece como administración FÉNIX. Todo o referido ao aspecto deportivo ( Fichas xogadores, pagos mutuas e árbitros, ….) deberá estar informatizado, a través de Internet. Para informar mellor sobre este tema, o próximo Martes e Xoves (14 e 16/08/12), a partir das 21:00 horas, manteranse sendas xuntanzas coas distintas categorías da Escola de Fútbol e Fútbol-Base.
No eido deportivo, o Club vai estar organizado en tres escalafóns:
a) Escola de Fútbol.- Formado por : Prebenxamíns, Benxamíns e Alevíns.
b) Fútbol Base.- Formado por : Infantís, Cadetes e Xuvenís.
c) Fútbol Afeccionado .- Que será o equipo de Rexional ou de Maiores.
Non habendo máis novas que comunicarche aproveitamos para saudarte e invitarte a colaborar connosco, pois, o Club é de todos os socios e persoas que colaboren no seu funcionamento.
Moraña 15 de Agosto de 2.012
A Directiva
